A ! Biensir l’om la touzour rèv li kontrol la natir. Li panss li va fé in kaz ossi kosto ké possib é siklone i fé ar pa li arien. Avèk son route goudroné - son shomin blaké — li oi pa koman siklone va annuir ali. Mèm li mète o défi siklone pou priv ali bann produi d’nésséssité si tèlman néna gran-gran boutik koméla avèk bonpé zafèr dodan. Pétète ossi in pé i panss lo mèr va zoué son rol pou sokour demoune.

Lontan té pa konmsa : Lé vré nou téi manke in pé d’toute zafèr é noute mézon lété pa tro solide-solide. Alor toute bann famiye, shak foi k’siklone lé anonssé, zot i mète a l’abri sak zot i pé pou évite lo zannuiman… Lontan téi ranfors la porte épi la fénète avèk in planh klouté an travèr. Bann madam téi mète zot po flèr a l’abri. Té i falé ossi ramass bann zanimo pou sak l’avé.

… Antouléka té i falé ni protèz anou konte siklone pars té sak nou l’avé d’myé pou fé. Lo sèl zafèr téi rèss anou pou fé sé d’anpar lo bann zannui a vnir. La natir sé la natir, lo van sé lo van, la plui sé la plui, la gross mèr sé la gross mèr. E lo déga possib assiréman sé lo déga possib.

A bon antandèr, salu !

Justin