Mi koné pa si zot la gingn lokazyon rogard léspozisyon bann Shagos. Pou mon par, moin la parti oir é moin la aprann ankor dé shoz dsi nout bann kouzin shagosien. Pa dé shoz pou fé ri la boush, mé dé shoz pou fé oir anou ankor plis la sovajri bann dominèr l’Anglétèr épi l’Amérik. Poitan, aforstan, moin lé fine konète dé shoz dsi mové trètman nout bann sèr é nout frèr shagosien la gagné avèk bann salté-la. Mi pans si in zour i fé bien listoir légzil bann Shagosien, nana do koi pou ékri é pou rakonté.

Zordi moin na zis in pti zafèr pou di. Lakèl ? Akout amoin bien ! Dsi in pano foto, inn koté l’ot, na dé foto. Inn sé simétyèr d’moun Salomon ou sinonsa Perhos Banos. In bann tonm bandoné, rokouvèr par in kantité zèrbaz, bann Shagosien la nétoiyé l’ané 2006 kan in délégasyon la gingn alé pou vizit Shagos. Avèk lo tan, lo bann tonm la viéyi, lo bann kroi la kasé, flèr na pi... Dsi la foto a koté, nana troi tonm bien an nik, bien ranjé, avèk in éstèl an béton. Kan moin la vi sa, moin la d’mandé kisa l’avé droi in trètmann favèr konm sa par rapor lé zot. Kan moin la lir kosa té marké d’si, moin la vi lété troi tonm lo shien larmé britanik. Inn foto koté l’ot, sa té i donn in bizar l’inprésyon : l’in présyon.

M’a dir azot in n’afèr, mi èm bien demoun i èm zot zanimo, donk mi konpran bien lo sans sak bann zanglé la fé. I paré, dan listoir, bann diktatèr té i fé plis in ka sanm zot zanimo ké avèk demoun kolonizé, sansa égzilé. Mi souvien, mon vyé profésèr listoir té i di anou konm sa, Hitler té i èm son bann gro shien, mé li té i èm pa bann juif, bann kominis, bann militan krétyen. Mé bann zanglé, sa i viv an démokrasi sa ! Parèy pou bann zamérikin ! Mé i fo kroir, viz-a-vi bann kolonizé, na poin gran diférans rant in dominèr kolonyalis épi in dominèr nazi. Touléka, i donn bien l’inprésyon. Eskiz si mi tronp, mé léspozisyon foto bann Shagosien i donn amoin a konprann ké mi tronp pa d’bokou.

Justin