In vil, kissoi pti, kissoi moiyin - gran vil, nou na poin La Rénion - i roganiz o moins in gran fèt pou mèt anlèr son kiltir, son tradission, son lidantité. Li anprofite lokazion pou fé vnir bann roprézantan d’ot kalité kiltir, d’ot kalité tradission. La lé korèk ! Akoz, sa i pèrmète bann demoun La Rénion anrishi zot mazinassion, pou pran in pé modèl dsi lé z’ot. Sa i pèrmète galman bann moun i sort déor rann anou vizite, pou mié konète anou épi toute bann kiltir mélanzé inn sanm l’ot...

Solman kan mi pans sa, mi san konm in zépine dann mon pié ! Konm in késtion i vien épi i arvien dann mon tète. Lé ga, kossa Sinni i fé ? Li èm fé lo rish, li èm fé lo blan : Salon la mézon, salon l’auto, salon lo gou, in spès bazar dsi la plas la préféktir, fé dartifis katorz ziliète. Sa i raport larzan, mé sa i fé pa la ronomé in vil ! Kèl sé nout limaz ? Kossa va niabou fé, kan nou va mazine nout kapitale, nou va mazine in féstival, in gran fète avèk bonpé lo son, bonpé koulèr, bon pé gayar-gayar zafèr.
La pa Sinni, limazinassion lé o pouvoir : fransh vérité !

NB : Nana in komik la di amoin, la méri Sinni sé in batay krab Victoria - Ti Morèl - Dindar 1 - Dindar 2. Pa sa va rolèv anou !

Justin