Mèrkrodi soir moin la parti in rényon la list Lebreton. Fransh vérité, pou ète intérésan, té intérésan. Kozé pou di dé shoz inportan, sé sak mi èm : kozé la boush rouvèr sa lé pa dann mon san sa. Mi pé dir azot, moin ti boir lo bann parol é sé in n’afèr drol, moin la sort la avèk l’ésopoir dann kèr.

L’éspoir dann kèr ! Pa solman pou in bon rézilta lo sis désanm mé l’éspoir osi pou nout péi. Koman ansort anou ? koman donn in l’avnir nout popilasyon ? Koman mète La Rényon é bann rényoné anlèr… Zot i koné Mao-Tsé-toung ? Sa té in granb bononm sa, ébin li téi di : sak i fo dann la lite sé ranfors son poin fèb, sé galman ranfors son poin for. Koué d’myé ksa, si ni vé vréman, mé vréman mèm sak ni vé.

Moin la sort dann la sal rényon lété tar, mé arien : in zourné ou i apran dé shoz, sé in journé bien gagné é mi pans moin la bien gagn mon zourné… Konm moin lété Sin-Pol, moin la pans lo « zéni Rényoné » pars nana in l’asosyasion la-ba i travay pou sa é i fo pa ni obliy Sin-Pol, sé la ké la komans pèp La rényon-nout kapital Istorik si zot i vé.

Nb – Rasir azot, moin la kant mèm rogard mon shomin pars l’avé in zé d-shikane, in jé d’baryèr, in kalité dévyasion pou sort dann Sin-Pol, mi anparl pa !