Mardi soir, konm in bonpé d’moun, moin la gard la télé pou oir kossa té i éspas la-ba dan Zétazini. Pou oir koman lé shoz i éspas. Koman le lansien i sava, koman lo nouvo i ariv, kissa i antour ali pou okip gouvèrnman so gran péi-la...
Bien sir, bann télé, konm dabitid, i invit inn-dé moun-sï la otèr pou koz déssi z’afèr, pétèt zot i koné pa, mé zot i fé sanblan konèt. An prinsip, déssèrtin moun i fé konmsi zot i koné.
An parmi lavé in tantine i apèl Rama Yade, minis dann gouvèrnman la Frans. Akoz sa lété la ? Pou kossa banna la invit aèl ? Mi koné pa...
Momandoné, moin la zap lo shène pou alé déssi in n’ot pars moin la konm antandi in n’afèr la fatig mo tète. Ala sak moin la antandi, éskiz la sosiété si moin la tronpé. I arsanm moin la tandi la minis dir sé pars papa lo prézidan té in lafrikin mé té pa in désandan zésklav ké li la niabou gingn la plas Prézidan... In kozman konmsa i domann in vré sobatkoz par rapor si èl la di sa pou vréman, sa i vé dir, si in moun son zansèt lété zésklav, li sré konm ipotéké ziska sizièm zénérasion, épi li vien ar pa bou gingn in plas shèf...
Si ni pous in pé pli loin, vik la plipar dmoun La Rénion nana zansèt zésklav, si mi konpran bien, la plipar sar zamé kapab pran la tèt in départman, in rézion, sansa in péi, sansa mèm l’Europ... Donkalor, i fo dmoun i sort déor pou komann anou ! Sa in n’afèr mi gob pa moin sa ! Mi gob pa sindrome gouyav de Frans !

Justin