Zot I koné sékour popilèr ? Sa sé in l’asosyasion i égzis in pé partou ; zot lé la l’androi d’moun i gingn pa vréman z’ot nésésèr. Konm shak ané sékour popilèr i fé in l’ankète pou oir si la mizèr i rokil sansa si li avans. Si néna plis demoun mizèr sansa si néna moins.

Lé drol di in n’afèr konmsa dann in péi konm La Frans s d’apré sak i di lo dézyèm péi lo pli rish dann l’Erop apré l’Almagn. La povrété téi doi pi égzisté si l’avé in bon distribisyon plito égal bann bien demoun la bézoin pou viv in pé konm k’i fo. La pad itou lo ka si tèlman bann z’asosyasion konm sokour popilèr i kontinyé ané papré ané sèye ède demoun…

Néna in n’ot ni koné galman téi apèl Coluche la désid fé pou inn-dé zané d’apré sak li pansé, mé lo tan la pasé, Coluche la gingn laksidan moto é lé désédé, néna d’ot zartis la pran la rolèv é rézilta pou zot konm pou sékour popilèr la mizèr i arète pa goumanté.

Tanka sokour popilèr, son l’ankète sète ané i aontr néna in famiy dsi sink lé pov pou vréman éi gingn pa zot soso korèk konm i fo é lo sink frui épi légime dann in zourné sa sé in n’afèr i fo alé domann Pèrnoèl-sansa Roland Garros mé konm zot i koné son min i arès dann son posh dsi la plas Barasoi.

Mé nou la-dan, mi koné pa si la fé l’ankète konm i fé dan La frans. An touléka arogard demoun obèz, marmaye konm gra moun lé pa difisil konprann i manz pa korèk dann nout péi. Poitan lo réjime manzé bann rényoné avèk lo ri, lo grin, lo brède, épi l’akomodman avèk zognon, piman tomate-lo frui galman vi k’néna tot sézon mi dout pa i doizète posib ékilib nout l’alimantasyon.

Sof listoir sin frui épi légime par zour, sa i rolève d’in rèv évéyé sirtou avèk la kantité d’moun mizèr. Donk sink frui épi légime paer zour, si i gingn.

Nb. Moin pèrsonèl mi pans la sékirité alimantèr sa sé in n’afèr i fo trapé absoliman é dann l’intéré nout popilasyon rényonèz.