Pöu Olivier Bancoult, président du GRC, sé in l’okazion pou fèr konète ankor myé listoir lo pèp shagossien. Néna plizyèr témoignaz lé prévu, an parmi sète lo kapitène le Norvaer, ankor vivan zordi, épi k’i viv dann bannzil Sésèl. Li va rakonte dann in l’anrozistroman koman dèrnyé voiyaz-la la éspassé.

La déportassion bande shagossien dopi zot bannzil natal ziska bannzil. Sésèl épi lil Maurice sa la éspass dopi sinkantan, toussa pou bande zanglé épi bande zamérikin fé in gran baz militèr dann Diégo Garcia lo pli gran anparmi bannzil Chagos-in baz dopi tan-la la ansèv pou agrèss bann pèp, é mèm konm prizon pou bande solda kaptiré téi sorte L’afghanistan. Lo Groupe Réfugiés Chagos i ve fé in rapèl mémoriel dsi in l’événman dramatik : in pèriod listoir toute demoune i doi konète pars sé in gran krime lo gouvèrnman britanik épi américain la komète an déportan la totalité d’in pèp dopi son bannzil natal ziska Maurice épi lé Sésèl

Biensir la pa in l’okazion pou fé la fète. I fète pa la déportassion d’in pèp,i fète pa nonpli toute bande viktime antéré dann Maurice, dann Sésèl épi dan d’ote landroi, i fète pa kan in kantité d’moune lété dann prizon san ké zot la fé in kékkonke krime, in kélkonke déli. Sinploman in moman listoir in pèp viktme la dominassion dë grande puissans é sa i mérite demoune i koné.

A bon antandèr, salu !

NB inn délégassion rényoné solidèr va assist bande zévènman.