I prétan dir, dann tan Zénéral De Gaulle kan l’avé in zéléksyon, bann kandida son parti té i fé kol zot foto, avèk lo zénéral konm lonbraj shinoi an aryèr d’zot. Kosa sa té i vé dir : vote pou moin sé vote pou De Gaulle. Lé drol k’in moun konm lo zénéral té kapab aksèp in n’afèr konmsa. Lé drol, mé lé vré ! Dann tan-la dopi 1958 ziska 1969, tout zéléksyon té frodé. Tout bann zéli, dann tan-la, la bénéfisyé la frode dann zéléksyon si tèlman ké dann nout zournal, kan téi mète zot nom, té i kol ansanm lo mo "la fraude". Lo gran zénéral la aksèp sa ! Tout bann préfé la aksèp sa galman ! Parl pi tout sak téi done azot in brové tout kalité in moun dsi la tèr i pé an avoir.
Pou kosa mi di sa ? Pars bann foto mi oi zordi dsi bann pano, i rapèl amoin mové souvnir dann tan mon zénès. Zot la vi konm moin ! Tout bann kandida Parti sosyalis la fé kol dsi zot foto in foto François Hollande. Mèm ké la fason la fé lo montaz i amontr Hollande lé pa si tèlman kontan in n’afèr konmsa : i diré li lé malèz koté bann kandida-la. I diré, sa i fé pa plézir ali ditou, sirtou kan i koné la plipar la fé vote kont li zéléksyon primèr...
Lo tan i shanj, mé oplis li shanj, oplis li lé parèy. Nana in pé la bézoin lo gran shèf blan i vien pou apiy zot rin. Pou sak i pans ankor bann zéspri la fine dékolonizé, mi kroi i fo zot i shanj l’opinyon. Pli pir, mi trouv lé bien domaj sé bann zélu, sak i doi done légzanp k’i déside fé z’afèr konmsa. De Gaulle lé mor l’ané 1970. Donk na plis sinkantan é poitan na bonpé z’afèr la pa shanjé dann koko in pé. Sof la frode éléktoral, konm té i fé dann tan-la, biensir !

Justin