La o la plinn dé palmis, odrémié pou ou, odrémié èt kolé séré èk lo mèr sinonsa “gar a ta guèl a la rékré“konm di lo shantèr Renaud. I di, lo mèr in pé boukou gro kèr i siport pa ditou son bann zopozan. Dann son kolimatèr, inn ti madam, lo ti madam i travay pou lédikasyon nasyonal, na pwin aryin pou roprosh a èl, mé konm, sirman li tyinbo tèt, lo mèr i rod lo pou é dikou li la mont la tèt la popilasyon pou dégot lo madam.

Sa in vié métod zané swasant. Ni apèl sa zané Péro-Pradié, si ou té pa dakor èk lo pouvwar, gar a ta guèl a la rékré. Bann kamarad viktim lordonans Debré i koné in nafèr. Si ou té pa dakor èk lo mèr kont pa d’si pou gingn inn ti plas, té anbosh aryink pétrolèz pou la kantinn é pou zéléksyon.kan mi wa foto dovan la méri zordi, fé pans a mwin pétrolèz zané swasant. Vi son laz, somanké lo mèr i dwa èt in pé nostalzik.

Souvan – dé-fwa ni san konm si inn dé shoval rotour i rèv rovir an aryèr. Ni san konm si zot i grins, ni san konm si zot ti pé d’san i bouy, vik i gingn pi fé konm avan. Zournal i di, zistoman zordi la o la plinn i rosanm bokou, zané swasant èk bann nérvi, bann gro bra, zournalis la gingn lo kou, la kas zot zaparèy foto konm dann zané swasant. Zamontrèr èk zamontrèz, si zamé zot i dwa lèv travay la o la plinn odrémié èt èk lo mèr sinon gar a ta guèl a la rékré !