Lakey lo sit > Chroniques > Oté
Sinon, lé konm si ni sava an frans a pié !
mardi 19 zanvié 2016, sanm
Mi ansouvyin gran débi minm, débi sèpténa Hollande, mi diré minm avan kli ariv lélizé pétèt, lo prézidan la di konm sa “Daborinn i fo atak a nou dirèktoman o shomaz“ vik an frans néna talèr prèské 5 million shomèr, tout ansam mi antyin pa. Li la pa di shomaz sé in boubou pou li, pou la frans, sa lé pa dann son vokabilèr, mé dizon konm li azi, mwin lé apopré sir, li lé pri dan la kol zak soso sanm sa.
Poukoué li lé pri dan la kol zak ? Li minm, momandoné li la di : Pou li roprézant dézyinm fwa zélèksyon, li va roprézanté, kondisyon li nyabou fé bèss shomaz. Zordi plito bésé, shomaz i goumant é i goumant konm sa dopi 2012. Poitan pa la fot éséyé vi la kantité larzan la déza donn bann patron. Dawar banna i ral in pé déryèr. La dopi yèr, i di lo prézidan la abat son dérnyé kart.
Lé vré lo tan la finn kourt éstèr, i rèt a pèn in an. La ba déor néna 5 million d-shomèr, sa i roprézant 10 pour san d’moun lé kapab travay, isi nou néna 30 pour san, nout shif a nou i roprézant plis 10 million par rapor la ba déor. Kèl kart li sar abat pou nou ? Késtyon shomaz, pou nou, sanm pou mwin, fo shavir lo total èk lo kapital, sétadir rovwar tout an lon an larz é an travèr, sinonsa lé konm si ni sava an frans a pié !