Mi pans, konm moin, zot la bien gard mésyé Macron apré rogard match fotball épi fé son joli avèk in madam bèk roz, avèk in rob a damyé rouz épi blan-lo bann koulèr son péi. El osi apré rogard match : Inn prézidan La Frans, l’ot prézidant La Croatie. Touzis si lé dé téi manz pa dann mèm z’asyète.

Moin lé sir in pé la trouv sa konm in kékshoz bien : lé dé lé jenn, lo dé lété kosté-kosté, dizon zot lété in pé konm toulmoun rodinèr. Mèm, si moin la bien vi dsi lo fas-book demoun téi vant lo madam pars èl la pran in plas dann l’aviyon chartèr pou vni oir lo match é lo prézidan La frans la pran son l’aviyon partikilyé : demoun la dénons lo prézidan, épi la bate la min pou la prézidant.
Moin pèrsonèl, kan moin téi rogard azot, ala bann zidé téi pass dann mon tète : Macron, prézidan bann rish épi razèr d’pint lo droi bann travayèr épi la pansyon bann rotrété, l’ot moin té i domann sinploman, dann mon kèr : « fanm-la la pa in nazi sa ? ». I di èl lé nasyonalis, èl sré pa in pé pliské sa ?

Madam Kolindar Grabar Ketarovic néna in pé bann zidé troubl dsi lo poinnvizé la politik. Dabor èl la zamé kashyète son l’admirasyon pou lo réjime nazi bann oustashi, in réjime la fé in kantité lo mor an parmi bann juif, bann jitan, bann kominis dann in tan réjime-la té i frikote sèryé avèk Hitler. Kan bann kominis avek Tito la pran pouvoir, bann solda nazii la parti kashyète dann l’Autriche é bann titiste la débisk azot é konm zot i pé atann la fé in kantité d’mor dann z’ot ran. La fé in moniman pou z’ot mémoir é madam la prézidante kan èl lété élu, la parti dovan lo moniman pou fé in diskour... Pou in zour dèye pou son péi solon èl.

Lé vré konm prézidant èl na poin in takonn pouvoir mé si èl i rovandik pa son kalité d’nazi, èl lé bien dann l’éstrème droite é dann in ka konmsa in prézidan La frans i doi méfyé. Frote avèlk lo shien ou pé gingn lo pis a moins ké ou néna déza.
Sinpa fanm-la in ? Modèst é tou ! Mé danzéré kant mèm !