Oté

Sinploman pou ké désèrtin i réviz in pé zot poinnvizé frankosantrist

Justin / 3 désanm 2019

JPEG - 43.6 ko

Mé zami, m’a dir azot mi yèm pa koz avèk zoinalis dann télévizyon konm dann radyo. Pou kosa mi di sa ? Pars momandoné, dsu la finisyon lo rantrokoz, lé posib lo zoinalis i gliss aou in pti késtyon la po banane é si ou la pa méfyé pou d’bon lé riskab ral aou dann in shomin ou la pa prévi pou alé… Zot i pans pa konm moin ? Poitan, moin la fine romark sé in n’afèr k’i ariv souvan dé foi mèm si la pèrsone mayé dann l’antrokozman lé bien kalifyé dann sète afèr-la.

M’a dir azot in légzanp mi sort pran dann in télé. L’avé in rantre kozé rant dé pèrsone apré parl dsi lo lidantité rényonèz. Sanm pou moin zot kozé té i tienbo d’bout épi mi anshèv dir lété kant mèm intérésan. Mé oila ké dsi la finisyon-sé la k’lé pli danzérab - lo zoinalis i poz in késtyon sinp, pétète in pé inosan, san z’ète, tou an étan. Ala lo késtyon : li téi vé savoir si pou partisip lo viv ansanm rényoné téi falé lo moun téi koz kréol. Késtyon délika, késtyon difisil pou réponn, késtyon danzéré. Pou kosa ?

Si ou i réponn oui ébin va dir ou lé pou lésklizyon désèrtin moun é dizon ké ou lé karéman séktèr, si ou lé pa kont lo moun i sort déor, touzis si i oi pa ou konm demoun lé pou lo bèr, larzann lo bèr avèk la krémyèr asiz dsi out zénou… Si ou i réponn non, alor ou i mète aou dann in n’ot train ankor ou la konmsi ou i di la lang kréol rényonèz na poin arien a oir avèk lo viv ansanm rényoné vi ké san parl kréol rényoné ou i pé koul aou dann ba d’soi lo viv ansanm.

Pou mon par moin la santi lo pyèz. Lé vré la pèrsone la réponn ni oui, ni non, é èl la di final de kont èl i oi in gro problèm sé dsi la kapasité dmoun La Rényon pou kozé, pou argimanté, kisoi an kréol kisoi an fransé. Moin pou mon par moin noré réponn oui, pars pou moin la lang kréol lé si inportan pou nou k’èl la gingn sèrv konm fil rouz rant tout demoun la viv La Rényon, é k’èl va ankor sèrv fil rouj dann l’avnir. Pou kosa moin nora réponn sa ? Sinploman pou k’sak i kroi La Rényon i égzis solman dopi ké zot l’ariv isi i roviz in pé zot poinnvizé frankosantrist.