Mi sort lir dann in zournal la Frans — zournal “Le Monde” — Air Mauritius épi Air Frans lé kok-an-pat pou désann Air Autral. Bien antandi, bann gran médya i bat tanbour la-dsi. L’èr-la, mésyé Didier i done la min é l’apré prépar ali, èk son bann konplis, pou koul nout konpagni réjyonal. Nana osi tout la bann i irl avèk lo lou, épi tout sak, konm moin la fine di, lé konplis a l’insi d’zot plin gré. Donk, in foi anplis, nana tout in bann kopin-kokin pou pas kal nout dévlopman.

Dann in kondisyon konmsa, lé nésésèr rézisté, é dan tout séktèr lé posib fé avans nout dévlopman dirab. Sanm pou moin, i fo fé avans ali ; dan tout séktèr lé possib ; kan i pé anpèsh ali rokilé, i fo anpèsh ali rokilé. Pars si Konsèy réjyonal sé in gro morso, li lé pa tout. Néna ankor Konsèy zénéral, néna ankor bann komine, nana galman bann z’asosyasion prodiktèr, bann kopérativ, épi nana shakinn rant nou, pou fé sak ni gingn dan l’androi ni lé. Sa in n’afèr lé fasil konprann pou sak nana in pé lo san rényoné dann vène.

Mi oi bien la batay Sint-Sizane dan nout mouvman pou dévlop La Rényon. Biensir, Sint-Sizane la pa tro gran, mé kisa i pé di li la pa bien dévlopé avèk kamarad Lucet épi kamarad Maurice ? Di lo kontrèr sé ramas mantèr ! Kisa i pé dir la komine na pi d’moiyin pou mèt in pé plis son dévlopman anlèr ? Sak i di sa i ramas mantèr, é lo program la list ansanm-ansanm lé la pou amontr nana z’afèr pou fé.

Bien antandi, si i lès bann sabotèr fèr, lé fouti. Konm di lo kont, zot lé zist bon pou vann l’éritaz kominal pou in pla lantiy.

 Justin