La pa in sirpriz. Plis 26 % délinkans Sintandré an zénéral lané dernyé ! Mé dapré lo Konséy Lokal de Sékirité é prévoyans d’la Délinkans, kanbryolaz dann la komine la bat lo rokor, li la grinp an flès ék in gomantasyon 46 % ! Mé la pa tout. An parmi lo kat komine lo trin la Polis : Sinpir, Lo Por, Sinn-Dni, Sintandré, sé ankor la komine Vira lo sanpyon. In statistik i fé pèr.

Malgré sa, pou pa zistéman afol la popilasyon, zotorité i di, sé pa in katastrof. Lo tablo i inkyèt pa lo Mèr nonpli. Dapré li na pwin dofé dan la kaz. E li néna minm in solisyon : lo proshin zopérasyon l’ANRU, an vil, va règ lo problèm. Foutor, va !

Mé lo pli étonan, pou anlav son min, lo Mèr i mét tout d’si lo kont lalkol. Lé vré lalkol sé t’in fléo la Rényon. Li fé bonpé déga, la pa bezwin fé isi in lis. Mé kisa li va fé kroir, si gomant lalkol, nora mwin volèr, nora pi kanbryolaz. Antouka, la pa la popilasyon Sintandré i sar gob in zafèr konmsa.
Lo fon lo problèm lé ayèr. Lo Mèr i koné. Zotorité osi.

Pol