Si mi di azot sa, sé par rapor sak mwin la viv kan mwin lété zanfan an parmi la sossyété bann zadilt é kan mi rapèl toute bann sityassion mwin la viv épi d’ote ossi la viv konm mwin, pa pou mwin mé pou bann marmaye mi kotoiye ankor zordi mi rogrète oir d’moune koman i trète azot –inn fasson abèss azot, épi i fé pèrde azot konfyanss dan zot. Inn fasson fé pèrde azot inn parti zot kapab dan la vi.

Kan mwin lété pti marmaye, toulmoune mwin té i kotoiye téi di mwin lé sisséptib pars mwin téi siporte pa la fasson in pé téi kass amwin pti boi. Mèm par la fasson zot téi rakonte déssèrtènn foi in lévènman maléré mwin la konète étan marmaye. Pars majine azot bien, ni vé, ni vé pa, dann noute lanfanss épi dan noute ladoléssanss, nou la fé dé shoz, zordi ankor nou la onte kan ni panss.

Alor d’roviv sa dé zané é dé zané apré k’sa l’arivé, lé tro dir pou mwin é mi sipoz lé dir pou toute sak in zour lété dann mèm sityassion ké mwin… Mi antan déza, in pé apré dir, in gro gramoune konm ou i gingn pa mète kékshoz konmsa de koté é pi panssé ? Èbin non, lo tan la bo passé, kékshoz la mortifyé in zour lé kapab mortifyé aou touzour.

Alor, siouplé ménaz la sanssibilité bann marmaye pars sé in bon afèr pouzot-dizon sa lé bon pou zot édikassion é si zot i oi apré zot kozman lo zyé in marmaye apré vnir rouz é inn-dé larm koulé, di azot bien zot i sorte fèr kékshoz i fo pa donk i fo fèr toute pou ratrape zot érèr… Mé sa lé pa fassil ditou.

A bon antandèr salu !