La poin lontan-in somenn par la - moin lété apré rogard match fotbal la Can. Madagascar lété apré zoué kont La répiblik kongo. Toudinkou, ala in n’afèr moin la vi dann tribine laba dann l’egypt é la étone amoin in pé : in ga avèk in drapo konm nout tout la fine oir in pé partou lété dann tribine é li téi port drapo-la avèk fyèrté : drapo la lété rouz blé zone. Moin la di dann mon kèr : ala in drapo la fine sote la mèr. Ala in drapo i komans voiyazé. Biensir, mi koné konm zot, néna in polémik dsi la késtyonn drapo mé final man sé lo pèp la Rényon va désidé kèl drapo va roprézant La Rényon épi pétète kèl l’ime va akonpagn ali.

Mé oila ké dann la matiné mèm, mi pass koté in gran l’afish é sak mi oi, in pé plis, té kapab fé rtonm amoin a la ranvèrs. Ronm sharète lakapar lo drapo an késtyon pou fé la piblisté pou lo boisson. Médam, Mésyé, la sosyété, mi koné pa si zot réaksyon lé konm la myène, mé moin la pa aprésyé piblisité-la. Dabor pars d’apré sak mi pans i pé pa fèr la piblisité pou l’alkol konmsa, épizapré pars néna kant mèm in konba bann zasosyasyon l’apré améné, pou fé arète demoun boir lalkol de tro.
Astèr si lo mark boisson la tiliz lo drapo la pa pou arien : sinploman pou ansèrv in santiman fyèrté néna shé désèrtin rényoné pou fé vann lalkol-la... Talèr lé riskab dir, pou sov nout kann, boir nout ronm mé in foi anplis mi di épi mi rodi néna in kantité produi i pé fé avèk kann é pa solman dosik avèk lo ronm. Alors si ni sov nout plantasyon la pa dsi lo ronm nou doi bazé… Arzout èk sa, in késtyon mi vé pozé : sak la désid sa, li pé dir amoin si in drapo nasyonal i pé ète marké par in boisson alkolik. Si drapo fransé i pé port la piblisité pou dovin, drapo lékoss la piblisité pou whisky, drapo riuss la vodka, étsétéra, étsétéra, la ké lo ra.

Réspé na pi don ? Mi oi pa ziska ousa lé shoz i pé alé ? Na in n’ot késtyon mi poz é pétète in pé va trouv mi dépass lé borne mé di amoin si tout moiyin lé bon pou fatig la moral lo pèp rényoné, pou abate son kapasité d’rézistans par lalkol. Mé zami, mi pans i fo pa ni lèss banna fé sak zot l’apré fé. Sa la pa in bon n’afèr pou nout pèp rényoné é la pa in bone afèr pou La Rényon.