Siplik pou méssyé préfé : Pass ankor pou lo règloman, mé pou laplikassyon alor !

Méssyé lo préfé, mi oi ou tazantan apré shanj règloman, mé mi doi dire aou mi konpran pa arien dann oute bande déssizyon san ki ni tète. Mé pétète wi sava dir amwin ou lé pou arien dann sète afère é sé bande gran syantifik parizien la dékouv lo bande zèst i fo fé pou kass la pate bande virus

Pass ankor pou lo bande règloman, mé pou lo laplikassion, la néna in n’afèr i kol pa ?

Mon shèr méssyé lo préfé, mi pé dire aou konm de koi, la plipar d’moune i aplike pa oute règloman. So matin, mwin lété térin l’aviyon é mwin téi oi toute demoune apré atande konm apré débarké, banna té pa la avèk oute bande règlomantassion : lo mask dann léspass piblik ? Zéro kalbass, même in pé bande ponpyé téi vien fé léspor té i mète pa sa dsi zot

Mi anparl pa ou bande mask dsou lo né. Mi anparl pa ou bande mask dsou lo manton. Arzoute èk sa, na poin in plass bande nouvo règloman lé afishé. Mi anparl ar pa ou bonbon maniok épi bonbon piman, manzé inn dsi l’ote. Mi an parl pa ou koman banna i sote dann bra inn-a-l’ote.

Alor méssyé lo préfé si sé arienk de mwin, ou noré pu abrèje in pé oute bande règloman é par dsi lo marshé kan ou na poin pèrsone pou fé apliké. Alor siouplé, alon si wi vé, klostèr an bande. Klostère bien ki klostèra, an dèrnyé épi pé dsi la tère pou lé z’om bone volonté. Si dé rèst i anrèst in réstan.

Movèze fortine, mové kère : somanké méssyé préfé li mèm li lé pa tro pou sak li di. Antouléka i diré konmsi.