Kan i di par ébzanpe ni vé in politik fé par bann Rényoné pou bann Rényoné pétète léta lokal épi lo gouvèrnman Paris i panss sak i di sa l’apré fé la démagoji — donk apré flate noute pèp alé oir zot i panss noute pèp na poin rézon par raporli lé tro naïf. Mwin pèrsonèlman mi kroi pa sa sé la démagoji, é mi panss bonpé rényoné konm mwin i panss égzaktoman sa la pa in démagoji. Mézami, mi jur lo bon sanss popilèr issi La Rényon sé in vré zarlor.

Nou noré in kantité légzanpe pou doné, pou amontr kan sé nou ké nana la possibilité oryante in gran politik par nou mèm é pou nou mèm, sé la ké la politik i réissi, sé la ké lo péi i avanss, sé la ké rézilta lé oboute noute shomin… Anpliss ké nou néna ossi in bon kantité léspèryanss é ké noute bann projé paré pou apliké banna i rojète… L’èr-la la katastrof i atann anou.

Mézami, fransh vérité, mi koné pa si néna in péi an déor d’La Rényon néna dann son karton in jarlor d’solission konm nou néna pou amenn anou pli d’van, pli o épou tire anou dann malizé. Démagji ? Pa ditou ! Réalité épi réalism, sa nou lé sir san pour san… L’èr-la i fo ékoute lo pèp épi son bann lidèr, pou konète kèl solission nou néna pou apliké é pou tiir anou dann malizé. In moiyin pou évite bann katastrof v’arivé.

A bon antandèr, salu !

Justin