Lo sète o soir, Lofis la lang kréol épi lo mèr lo Port i roganiz in soiré sirandane... In séans sirandane, sa i komans par in l’invitasyon. In moun i di :« Sirandane ! ». Épi lo moun an parmi i réponn :« Kanpèsh ! ». Sa i vé dir, toute lé dakor pou zoué, épi la parti i pé komansé.
In sirandane, sa lé konm in dovinète. Inn ipoz in késtyon, épi lé z’ot i rode kossa i vé dir. Sak la trouvé, i kri « kanpèshépi » li di son solisyon. Alon pran in l’égzanp sinp. "Sirandane ! Kat pat déssi kat pat, kat pat i sava kat pat i rèss ? "Kanpèsh :"Lo shate déssi in shèz !"… Sa lé byin bon !
Mi pans nana plizyèr santène sirandane La Rényon, nana ossi plizyèr santène ; la-ba Maurice… nana mèm sak pétète in pé va invante lo soir mèm, pars sé konm sa ké zot i énè... Mi souvyin mèm in zour, dann tan la frode éléktoral té i marsh a fon, in mèr, prézidan lo biro té apré frodé. La fé in spès séga bélo dann biro-la, l’irne la kapoté é lo prézidan la marsh kate pate pou trap bann l’anvlope. Dann "Témoignages » in léktèr la fé toutsuite in sirandane, li la di :« Déssi dé pate, déssi kat pate, toultan li frode. Koman li nonm ? »… M’a dir azot zis sa la spassé Sinte-Rose, nana bèl az avèk bo tan, mi souvyin byin l’apèl ali :« Lo mèr kat pat ! ».

Justin