An so moman bann mèr la rényon lé an voyaz laba déor pou zot kongré. Konm i fé tou lé zan, fin d’lané, i réini bann mèr laba Paris, dé zour d’kongré, pou éspliké difikilté bann mèr néna pou vyinbou jèr zot kominn konm i fodré. Si ni baz a nou, solman si lanons lasosiasyon dé mèr, si lo bidzé an provizyon pou sa, i fodré déza, solman pou lo vwayaz, prèskin domi lavyon ryink pou zot si tout, té désid vwayaz minm zour, i prétan navé plis dé san moun lé parti. Domann pa mwin poukoué navé tousa d’moun vik néna ryink vinn kat mèr la rényon. Pétèt la profité pou aminn bann manèv lo mèr osi ? Sokrétèr tousala. Pou mwin kongré dé mèr, soré ryink pou bann mèr, pa pou zadzwin ousinonsa pou konséyé. Alorss néna i koz la d’si.

Pou in kou i koz zisto rézon. Dann télé, dann radio, dann zournal, i domann pou rézon poukoué tousala d’moun laba é sirtou kisa i sar pèyé ? Mé boudikont, sé pa la késtyon d’savwar kisa la parti, konbyin la résté, vik sanm pou mwin larzan néna, lé pa sa i fé défo. Pou mwin, sé lo rézilta o bout ki kont. Si sominn proshinn o rotour, néna lé kab di a nou gouvérman la ékout a nou, i rokoné nou la kal dèrièr dopi lontan, pou galizé, pou in kou, i désid tyinbo kont nout difikilté, kansréti inn ti sokour, alorss la ni bat la min é ni di bravo, si otroman konm mwin la antandi dir dann télé, i prétan bana i kontinié sèr la vis, donkalor bann mèr lé riskab rovni a sèk.

So matin mi diskit èk in travayèr la kominn, li di a mwin lo mèr i rovyin mardi é li arzout osi, prièr bon dié pouk li rant èk in bon moné, vik li lé parti sirtou pou rod sa. Koman ésplik a li, la pa konm sa i tourn lo fim. Si ni baz si zaktialité zordi, so matin, dann télé la di, lo promié minis lé v’ni zédi o kongré, é konm dé prévi li la kozé, grosi-modo li di, odrémié pi tro kont si gouvérman tan la, an sort a zot par zot minm, boudikont konm si i di a nou, sirkilé na pwin ryin pou war !