Mi koné pa si zot i souvien bann leson nou la trouvé é pétète ni pé trouv ankor dann liv l’istoir. Mi koné pa si zot i an souvien ankor lo nom bann gran révolisyonèr konm Saint-Just, Robespierre, Couton épi d’ot ankor. Mi koné pa si zot téi rapèl ankor la pèryod la térèr kan la giyotine té i marsh a-fon la kès.

Pou mon par, moin na konm l’inprésyon dann mon parkour l’ékol sé kan moin la aprann l’istoir la révolisyon fransèz ké moin lété lo pli kontan. Dizon, karéman, moin té i toush pi la tèr kan moin téi aprann mon bann léson. Mi pans sé dann l’istoir La Révolisyon ké moin la konète bann prinsip lé ankor valab zordi.

Lé valab zordi, mé lé ataké konm zamé dann lo mond antyé, dann l’erop épi osi dann La Frans. Promyèr foi mi antann in promyé minis apré dir li pé alé ziska siprime lo droi pou manifèsté dann Paris. Tousa pars son gouvèrnman la tiliz kék santène kasèr pou rotourn l’opignon kont lo sindika … Sa sé in n’afèr ni koné dopi lontan pars sé in tak-tik bann gouvèrnman gosh konm droit : fèr kasé pou rann lo mouvman non-popilèr.

Pou kosa, parl fète, moin la parl La Révolisyon fransèz 1789 : dabor pou lo bann prinsip moin la parl an-o la épi pars bann révolisyonèr téi di galman : « Donn pa la libèrté bann z’ènmi la libèrté ! ». Kèl koté i lé zordi bann z’ènmi la libèrté ? Zot sré pa di koté k’ lo bann média i rogard pa souvan ?