Zot i koné nana inn-dé pèrsone i gingn fé dé-troi zafèr an mèm tan ? Zot i koné ossi nana in pé i gingn pa fé dë zafèr an mèm tan. Zot i ansouvien in prézidan amérikin té i apèl Ford - Gerald Ford - i prétan di li té gingn pa kourir épi mash son sinegome an mèm tan.
In zour, in zournalist la sèy poz ali in késtion, li la sèye réponn solman konm li té i kour, badav ! Li la tonm atèr.

Poufèr mi di sa ? Akoz nana marmay lékol i konpran pa fransé, biensir li gingn pa koz fransé ! Li koné pa roprézant bann son, i fo li aprann ankodé épi dékodé. I fo ankor li koné la vi koman i lé an Frans ou bien li aprann. Sa i fé sink zafèr an mèm tan, si moin la bien konté... Kréol ? li koné kozé, li gingn konprann, li koné la vi koman i lé issi, i fo zis li gingn roprézant bann son, donk ankodé-dékodé, sa i fé dë solman.

Lé vré, aprann lékol sé fatig in pé son tète, mé moin ou i fatig, lé méyèr pou ou : alor, akoz rod fé gingn bann marmay la fièv dan la tète pou la po patate ? Akoz pa fé aprann ali sa dousman-dousman, an dous é san sékous. Moin, moin lé pou sa, moin mi fors, plis moin lé bien ; Sirtou si sé pou gingn in méyèr rézilta !

Justin