Oté

« Sis pyé sou tèr na poin l’amizman »

In kozman pou la rout

Justin / 19 mé 2018

JPEG - 43.6 ko

Moin la vi kékpar sa in provèrb bann zantiyé. Li di bien sak l i vé dir é antouléka li di bien kan ou lé sis pyé sou tèr kont pi trouv l’amizman. Biensir, dsi in n’afèr konmsa, mi pronons pa moin : shakinnn i kroi sak li vé kroir. Sak i kroi la vi apré la mor, li kroi ! Sak i kroi l’anfèr, pirgatoir li kroi ! Sak i kroil’étèr roiyom tout bann l’éspri, li kroi létèr ! Final de kont shakinnn i kroi sak li vé. Mé si ni lir bien nout kozman, li anparl pa nou la vi apré la mor pou vréman, mé li di anou profite la vi kan lé ankor tan. Pars kan lé pi tan, lé pi tan... Alé ! Mi lèss azot rofléshi la dsi é ni artrouv pli d’van. Sipétadyé .