Mézami kan in marmaye i sorte CM2 pou alé dann in klass sizyème, mi pé dir azot sa in gran shanjman pou li dann son vi d’zélève…kissoi dann lorganizassion létablisman : avan sé lékol, apré sé kolèj é sa lé pa parèye ditou. kissoi dann lorganizassion son zétide ; kissoi ankor dsi lo poinnvizé son prope résponsabilté. Kissoi ankor in nouvo program avèk bande nouvo matyère.

Zistoman késtyon d’programme. Si néna in bonpé matyère konm l’avé dann CM2, néna d’ote i roprézante in nouvoté pou lo marmaye. Si néna franssé, matématik, listoir la zéografi é toute sak i s’ansui néna in kantité matyèr nouvèl : la fizik, SVT, léspor, la mizik épi ankor in takon zopsyon néna pwin partou mé néna plizanpliss.

Konm mwin la ékrir yèr dann mon modékri, ala lokazyon pou armass bande konssanss an pliss é mèm si in pé i pé di sa lé riskab fatig la tète, sanm pou mwin sa sé kékshoze bande marmaye épi bande paran i doi aprésyé… Antansyon, mi rode pa pou éskinte bande marmaye, mé mi rode sirtou anrishi zot konéssanss an kantité é an kalité é d’apré mwin sa lé pa pou fère azot de tor a kondission sa lé bien améné.

Donk in program bien fourni. Mé a bien rogardé mi trouv i manke kékshoz. Kossa ? Sinploman la lang épi la kiltir kréol rényonèz zénéralizé pou toute marmaye La Rényon. Kan zot i trape zot onzan. Onzan, sé laze lo dépar pou in nouvo stade dann la vi in zanfan – in ado. In nouvo stade dan la vi d’in jenn rényoné é dann in ka konmsa akoz pa in bon baze dann la lang é la kiltir son péi.

Ala pou kossa, mi di, i manke in n’afèr ladan.