Mi pans zot la romarké, na in pé d’moun La Rénion i èm répète dé-troi foi lo mèm zafèr. Zot i di konmsa : lé zo-li, lé zo-li, lé zo-li ; sansa ankor : i fé sho, i fé sho, i fé sho... Konmsa la poin pou tronpé : dizon lé pa riyink zoli, lé pliské zoli, sansa i fé pa riyink sho, i fé pliské sho. Sa nout manièr kozé, sa ! Sa sé nout éstil !
Mé dépi in pé d’tan i antan arienk rangène-la. I di konmsa, la vi lé shèr, lé shèr, lé shèr...! Sa i vé dir lé pa shèr pou zoué, lé pa shèr pou plézanté, lé pliské shèr an réalité. Lé vré : tout bann lankète i fé, i amontr sa-mèm. Lasosiasion "Agir po nout tout" la parti ashté dann in gran komèrs, bann marshandiz sak lé lo pli nésésèr : kroi amoin, la pa gingn de koi pou gaté, mi pé dir azot !
Méssié Jégo l’arivé li-la. Na poin lontan li la di inn-dé solission : solman li la trok in pé lo pa, vik li la di la rézion tir loktroi d’mèr déssi bann marshandiz i pèy pa so linpo-la... Bann fonksionèr fatigué, léspri in pé kaziman boushé la donn ali inn- dé tiyo, mé lavé lo trou anndan, amoins ké la fé sa pou li gingn in boush-ta-guèl. Lo passé, sé lo passé, sak la pass yèr, i pas spa zordi.
So kou isi li arvien : lé bon ! Nout port lé rouvèr ! Mé pou kossa ? Mi éspèr pa pou larg inn-dé foutan épi pou shapé apré ! Mi éspèr va diskité pou trouv vré solission.
Solission nana, sa moin lé sir, pars si la poin, la pa bézoin blagué, jazè, fé sèrvolan sanm nou, gaspiy biyé lavion. Apré mèm a plant in pié d’boi pou pa gaspiy la natir.
Mi souète va fé in vré sobatkoz pou shakinn mète in bon tik-tak dann la diskission. Nou bann ti-kolon, sa mèm ni vé ! Nou l’assé sobatkozé pou la po patat !

Justin