Mi ékout lo télé, mi oi in minist, i di minis travay, mé li okip in pé toute d’apré moin ! Li l’apré koz déssi lo lindi d’pannkote. Konm la pli i sharj déssi la tol, moin na limpréssion i sava siprime zour d’travay-la. Danm mon kèr, mi pans rozman, dopi in bon koup de tan nora di fé sa. I pé pa travay plis pou gingn moins kant mèm !

I fé in lanbéli tout in kou. Alor, mi antann sa i raport dé miliar pou bann vié pèrsone, épi bann handikap... Alor, mi konpran la poin pou siprimé, mé pou donn lo shoi bann lantropriz pran sa déssi lo RTT, sansa fé travay in n’ot zour férié, sansa fé travay in hèr an plis pandan sèt zour, pou trap lo sétèr d’tan.

Moin k’té i kroi dopi lané dernièr té i fé déza konmsa, suivan sak moin la antann, épi sak moin la lir. Alor, mi di : akoz i fo di sa ankor ? I di sé pou siprime la pagaye : dann kalandrié zour-la lé pi péyé, dann la réalité, téi fé travay dopi 2005 pou la po patate akoz pou l’arzan, wa rogard dann trou. Dann mon kèr, mi di so gouvèrnman-la, la lang i grate. I fo li koz, sof koué k’li di, mé i fo li koz, é pandann tan-la, kabri i manz salad. Bann travayèr, la posh lé plate.

Justin