Mé la pa dsa mi vé anparl zordi. Mi vé anparl lo tan Gasparin-Brunet, in zénérassion bann zom politik ézot bann siportèr é siportriss kaziman admiratèr épi admiratriss é an parmi l’avé in madam shèf koral dan légliz siportriss Gasparin si mi tronpe pa é in zour lo Gasparin apré kozé — zoli kozé — é Katarina l’avé pi d’konpliman pou lo gran t »om é èl téi di an parmi son shaplé d’félissitassion : « Sof kouèk ti di mé k’ti koz bien ! ». Son bon mo la pass moune an moune, famiye an famiye, dalon an dalon ziska k’in zour mi panss la tinde.

Pou kossa mi di sa, pars lé lèr pou mwin fé mon modékri édsi l’kou d’granmatin mi panss la kominikassio é kossa èl i ansèrv… normalman èl i ansèrv pou lo moune bien fé konprann ali. I ansèrv galman pou bien kominiké é pétèe si wi oi lé shoz koté la propagann w pé dir sé pou k’demoune i panss ou néna rézon-donk wi amenn demoune a panss konm ou épi done aou rézon. L’èr-la ou lé dann lakssion sossial, politik, kiltirèl anfin in pé sak wi vé.

Mé défoi mwin la romarke in n’afèr shé d’moune i manyé bien bann mo, bann zéspréssion épi bann konsèpt néna in volonté d’kraz lo linterlokitèr dsou lo bannmo épi bann zéspréssion kan lé anplin dann in sobatkoz… In sobatkoz sa i pèrmète déssèrtin fé zot défoulaz vèrbal, épi kraz an passan lo kont-sobatkozèr.. L’èrla nou lé dann in bataye lo mo, défoi in bataye zidé — bon zafèr, mové zafèr ? Inn manyèr fé pass la konéssanss sansa sinploman pou kraz lo ladvèrsèr san fé avannss son prop zidé.

Alé ! Mi di azot sa konm mi rossan sa so matin l’èr kok lé pa loin shanté. Si zot i vé rofléshi rofléshi… A bon antandèr salu !

Justin