Mézami dopi étan pti néna in zistir k’i kour dann noute famiye dopi lontan é k’i kontinyé kour ankor zordi… Figuir azot mon vyé famiye la viv dann tan Gasparin-Brunet donk dann tan lontan - avan la guèr 1939-45 - é dann tan demoune téi konpran pa tro franssé. La chètftène la koral téi apèl Katarina é in zour Gasparin la vni fé in diskour pou zélékssyon avèk bande mo ronflan, bande gran mo néna arienk dann gro liv é Katarina téi ékoute lo diskour la boush rouvèr.

Kan té fini toute demoune la bate la min é Katarina la di : « Sof kouèk ti di mé k’li koz bien ! ». Lo tan la passé, zordi ankor néna in kantité d’moune i konpran pa lo franssé soutenu, mé zot i kontinyé dir sak mwin la marke an-o la. Mi koné pa kossa zot i anpanss mé mwin mi poze amwin késtyon.

Alé ! Mi invite azot bien rofléshi la dsi é ni artrouv pli d’van. Sipétadyé.

Justin