Kan in moun i di bonzour, i domann a nou “èk sa koman i lé ?“ ni réponn touzour “konm si-konmsa“. In pé i di “ti misèr-ti misèr“. Néna i di osi “la misèr lé d’si nou, konm karapat si tété bèf mèg“. Shakinn i donn an so moman la konm i di son dogré d’kor ousinonsa son dogré d’misèr. In gran limoris la ba an frans la di konm sa “kan li lété p’ti, son kaz, lo moman lo pli dir, lété la fin di mwa é li arzout, sirtou lé trant dérnié zour“. Lo limoris i apèl kolush. Té son manièr pou li, pou anparl la misèr li la koni in pé konm nout tout. Trant zour la misèr par mwa.

Trant, ala in shif ki dwa rotonir nout latansyon zordi, pa inn, pa dé, pa trwa……pa trant zour, trant zané ni dwa atann ankor pou pouvwar éfas la misèr désertin. So matin mi lir dann zournal, lo parti socialis la rényon la antann rantrozot pou promèt a nou légalité réèl pou 2046. Dan trant an. I provwa trant an pou règ tout é aprésa nou lé an lèr, tran an pou mèt a nou o nivo déor. Kèl bèl lintansyon ? An mwin minm mi di, dan léta nout péi i lé, i pé pa rodrèss tousala din sèl kou, i fo manié tousala èk prékosyon sinonsa va kasé.

Konm nou, banna i rokoné ké la départmantalisasyon konm i lé, la aminn a nou dann in linpas dopi swasant dizan. Dann swasant dis néna inn vintinn lé pou zot. Katrovin inn ziska katrovin kinz lé pou zot. Domil dé ziska domil sèt lé pou zot é zordi ankor domil douz ziska domil disèt lé pou zot ankor. Di pa mwin navé pwin mwayin fé légalité réèl, kansréti zis komansé pou fé war. Zordi zot néna sink dépité, in pé i di minm sis, zot néna in sénatèr, di pa mwin na pwin d’moun pou fé. Sof si ni konsidèr ké zot i kont pou la po patat.