I prétan dir, avèk la kriz, demoun i ashté plizanplis kofor. Sak nana in bon moné i ashté in gran, avèk in gran kapasité. Sak na poin tro lo pourkoi, i ashté in pti, an tol mèm pa ranbouré par anndan.
Sof, mé demoun i ashète mèm so bann kofor... I paré mèm, larzan lé ankor fré, lank la pankor sèk, i vienn zis arivé déssi lo kont, demoun i tir toutsuit sak zot i gingn...
Moin, moin la antann parl in n’afèr - moin la pa vi solman - lavé in foi, in gramoun andikap, toultan li l’apré koud in poupète. Moin té i trouv ziska drol, poupète-la i déshir toultan komansman lo moi. Mé, sa la pa inkiète amoin plis-k’i fo ! Alor, in zour li gingn in kriz. Épi li anval son kiyèr. Son famiy, la min in pé long, i rod larzan i trouv pa... I kalkil li la fé kado d’moun.
Mé li nana in nové : ala zordi li ashté in nafèr, ala domin li ashté in n’ot afèr, li manz gran-gran bout depin-boushon é gratiné siouplé. La famiy i komans douté. Fors-a-fors, toulmoun la konprann la vérité : larzan té dann vant lo poupète... Sa in bon kofor sa ! Na poin pèrsone pou trouv son klé sof lo nové bien fourné !

Justin