Lé fasil pou kozé kan sé pa ou k’i doi fé. Lé fasil kritiké galman : la lang la poin lo zo, bien sir, sa mi koné. Solman, kan mi oi tousa dézord nana dann bann komine kan i shanj lo mèr, moin lé d’avi ké lé pliské tan pou mète tout bann problèm a-plat épi oir koman i fo fé.

Dabor, lé difisil konprann pou kossa déssèrtin mèr la miltipli par dé foi lo nonb pèrsonèl, sof dir zintéré la popilasion té pa son traka. Konm di kréol : poisson i pouri par la tète, lo mové légzanp i sort par an-o. Alor, étone pa si zordi, in bon pé dmoun i vé in pti kontra ! Mèm si la famiy la pa bien bézoin, mé i fo fé konm toulmoun i kroi k’toulmoun i fé. Épi, sak té i gingn in pti salèr, li vé i kontinié. Alor lé fasil ral ali dann in fo trin.

Na dmoun i kroi la komine i gingn anbosh tout sak la poin travay, tout sak na poin métié, tout sak na poin diplôme, olèrk lankadroman, vik in pé i di, bann kad i ansèrv pa arien : sa bann moun i gingn gro larzan, i tié pa z’ot kor, é lé la arienk pou an-nuir bann ti-kolon. Momandoné, déssèrtin pèrsonèl, déssèrtin loto, in bann matérièl, pèrsone i artrouv pi : i di na in pé dmoun lé an konzé pèrpétièl, in pé loto la fine vann par bout Madagaskar, téléfone parl pi... I prétan dir ziska bann prizonié i kontinié gingn z’ot moné !!!

Oté ! Si in lantropriz i fé konmsa, li lé mor, dis foi mor, san foi mor ! Mé sof lo réspé pou bann mèr, pou bann z’élu, pou bann résponsab sak i fé in bon boulo... zot i kroi pa i fo mète in pé la modèrnis dann lo bann komine konm k’i fé èk nout lékonomi, épi nout sosiété ?

 Justin