Oté

« Sogré rant troi ? Sogré Polisinél ! »

In kozman pou la rout

Justin / 15 zwin 2019

JPEG - 43.6 ko

Si in moun i koné in n’afèr é si li fèrm son také, lé sir pèrsone i konétra pa. Si li partaz avèk in zami, zot lé dé pou konète sa. Si i di in troizyèm, ala dizon lé fine fané partou. Pars troi moun pou tienbo z’ot lang an mèm tan, sa i égzis pa. Konm i di sé in sogré Polisinèl, pars sa i n pèrsonaz téat bann zitalien i koz for épi i tienbo pa son lang. Moin néna dë zami i sava médsin é médsin i donn azot in takon médikaman pou la tansyon é inn i di avèk l’ot : « moin mi boir tizane losto, mi sa pa boir tousa médikaman-la ». Tizane boi d’losto i marsh é lo zour kontrol l’arivé. Inn i di avèk l’ot : « oté alon pa di doktèr-la nout sogré boi d’losto ». « Bien sir l’ot i di ! » Inn i pass avan é kan li sort l’ot i rant.L’èr-la médsin i di avèk li : « In bon tizane, tizane losto la ! » . Lo promyé l’avé pa gingn tonir son lang. Alé ! Mi kite azot rofléshi la dsi é ni rotrouv pli d’van. Sipétadyé !