Zistoman zot i koné la rouvèr in boute la route an mèr, mé mi sava pa anparl sa pars mi vé pa gate mon dimansh é si mi anparl sar in n’ot zour siplétadyé. Toute fasson mi yème pa kan mon péi lé pèrdan é so fwa issi lé sir li lé pèrdan : kan lété possib gingn in route sékirizé avèk in tram-train,avèk in zèstyon an bon père d’famiye, pou l’instan nou la gingn solman in boute la route la pankor fini.

Alon artourn dsu lo sizé k’i intérèss amwin zordi :in magazine télé. Donk apré zoinal parlé, i anons in kékshoz nouvo, in magazine télé.. Mwin téi kroi té i sava amontr bande rogardèr d’télé in magazine dsu La Rényon, sansa dsu noute bande voizin, anfin kékshoz pou done anou léspoir noute péi i avans.

Kossa mi oi ?

In magazine franssé-métro , avèk poisson fimé i sorte Marseille, éspadriye La franss, golaz-paraplui si zot i vé- i fé dan la Bretagne sansa la Normandie donk bande produi demoune kouraj i sèye dévlopé épi ranporte inn marshé pli gran. Mi pans lé bon pou zot é kouraj azot....Mé arien dsu La Rényon,arien dsu Moris, dsu Séssèl,Madégaskar é noute séktèr loséan indien.

Oila antouléka, in magazine télé pou in dimansh dann in télé La Rényon...Mézami konm di lo provèrb : «  Soi lé kouyon, soi i fé l’kouyon, osinonsa lé dé an mèm tan ». Inn sèrtène fasson pou kontinyé alyène anou ankor pliss par rapor noute prop réalité !

A bon ékoutèr :salu !