Mé zami, prézidan Macron la vni La Rényon pou la po d’patate. Akoz sa ? La pa bézoin sort politéknik pou konète sa par l’avans pars sak i pé rann son voiyaz éfikas ébin li la pass par koté.. . La Rényon néna in maladi ! Maladi-la i apèl néo kolonyalis - kolonyalis nouvo si zot vé, ébin konm lété pad itou dann son tète arète avèk in sistèm konmsa ébin lété prévizib sèl zafèr li té i sava fén sé poz in pansman dsi in zanm de boi, é toulmoun i koné sa i géri pa boubou.

Toulmoun i koné sa isi La Rényon si tèlman ni antann par isi i fo shanj lozisyèl, par laba tourn la paj i sifi pa kan i fo shanj liv, d’ot ankor i di i fo l’otonomi... Dopi l’ané 1959 nout parti la fine dir bann ti mézir i ansèrv arien si i shanj pa bann zisntitisyon pou ou épi pou d’ot : l’outre-mèr la pa bézoin rakomodaz, li la bézoin bann solisyon nouvèl, é si la p sa, alé zoué kanète. Si néna ankor d’moun popns ni pé kon tinyé fé konm avan, konm i fé dé zané épi dé zané, mi di pa i gingn ar pa inndé pti rézilta, mé in vré rézilta sa non.

A partir d’la, toulmoun té i pé konprann voiyaz prézidansyèl lété in voiyaz pou arien é li téi pé gingn lo mèm rézilta dopi Pari laba, san vnir polyé nout l’èr isi, é anplis san fou kou d’galé dann ni gèp. Sé sak li la fé é dopi ni oi lo rézilta é tout bann koupèr d’shové an kat dann sans la larjèr, zot i sèye fé prann anou po d’shanm pou pla kouvèr, makaroni pou la bouji. In pé i di osi vési pou lantèrn !
Konm i di : Soi zot lé kouyon, soi zot i fé l’kouyon !