Bo ! Banna la vote lo mové loi déssi la rotrète, ziska la proshène. Pars, toute demoun i koné so réform-la i règ ar pa lo problèm. Bann salèr lé tro fèb donk bann kotizasyon lé fay galman. Na tro shomaj dépi in bon koup de tan, donk la mashine pou kotizé i fonksyone pa byin. Sirtou sak i kol pa sè kan i vé tir larzan dan la posh sak na poin. Pa dann sak nana posh-plin !

In fizi pou tir dann koin
La pa pou sov lo réjime par répartisyon i fé so réform-la, mé plito pou mète anlèr lo sistèm par kapitalizasyon. Pars, kan ou i travay, momandoné ou i pans out vyé zour. Ou i rogarde out bann vyé kamarad, ou i an apèrsoi, zot rotrète lé fay. L’èr-la ou i rode in plan épargn-rotrète. So kou issi ou i tonm an plin dann rézime la kapitalizasyon é la loi la mète in takon l’artik pou sa.

Kisa k’i ri la-dan ?
Sarkozy, byinsir. Pa Nikola, mé Guillonm, lo frèr... lo gran patron lo group Malakoff-Médérick. Li la fine fé in sosyété pou mète son bann fon l’épargn rotrète déssi lo marshé... Sé sa i sava miltipliy larzan konm in pé la miltiply de pin avèk poisson. Pou ki ? Pa pou bann ti-kolon, byinsir, pou sak lo pla lé byin gonflé... Alor, sokour lo réjime par répartisyon ? Inn tyork. Sa inn krak, in kou d’pintir. Plito k’fé kroir anou in n’afèr konmsa, alé plito, konm di mon défin tonton, pouss kanar dan la désante.

Justin