Zordi sé promyé avril é noré té possib lanss in foss nouvèl pou étone in pé l’ moune, mé mi trouv drol zordi promyé avril 2026 la pa tro lanss listoir poisson d’avril… Pétète bann jenn marmaye la trouv in lamizman la-dan, mé la sossyété an zénéral la touf in pé fète-la é pou insi dir la prèss pa anparlé.

Lé possib zordi laktyalité téi done pa lokazyon tro plézanté : i fo dir la guèr, la mizèr, épi bann kalité éskandal konm néna i invite pa nou pou plézanté.. La shèrté bann produi pétrolyé sa i fé pa rir pèrssone é demoune lé a dmandé kossa i fo fèr pou kalm in pé la shèrté d’la vi épi la goumantassion léssans pou mète dan l’oto.

Ni parl léssans, alé oir néna in linstrission mondyal pou rann lénèrzi pli vèr é sa i press mé sa i avanss pa tro an partikilyé issi La Rényon.. Si mi kroi Ary dann tan Paul Vergès nou l’avé vintan d’avanss dsi La franss é zordi nou néna trantan d’rotar dsi la késtyonn lénèrzi vèr.léliminassion bann zénèrzi karboné.

Sak i fédir amwin : si solèye lé toulmoune kossa bann pouvoir piblik i f épou rann shakin lo bout i doi ali ?

A bon antandèr salu !

Justin