Kan la mèr lé mové, kan rad’maré i donn le grin partou, la pa lèr, la pa le moman pou rod dispite avèk voizin, zami, paran. Kan volkan lé an révolision, i ménas demoun, i ménas la kaz, la pa lèr, la pa le moman pou ral le kont avèk voizin, famiy, paran. Kan koudvan i déklansh, kan koudvan i débransh, la pa lèr, la pa le moman pou soulèv la guèr avèk voizin, zami, paran.

Solidèr !
I anpèsh pa shakinn an avoir son lopignon, in majorité é in lopozision, la démokrasi épi la diskission. Mé i pèrmète mète an lèr lintéré la popilasion pou alé dann diréksion laméliorasion, dann diréksion lantant, épi le dévlopman.

Solidèr !
Mé si ou lé pa solidèr, sé konm si ou na in min anmaré, sé konm in famiy divizé, konm in kartié ékartiyé, konm in pèp éparpiyé, konm in péi la éklaté. Sé konm k’i diré ou i tir ou mèm in bal fizi dann out pié. Sé konm in ralé poussé k’i komans é k’i fini zamé.

Solidèr !
Pars nou la bézoin la solidarité, nou la bézoin lantant, nou la bézoin l’inion pou fé rokil la divizion, po fé avans La Rénion. Pars otroman, na poin solision. Pars si ou i rod in bon définission, ou pé dir in n’il, sé in landroi, sé in rézion, sé in Rénion.

Solidèr !
Dann in n’il : in landroi ou i pé pa s’an pass inn-a-l’ot*.

* « une île, c’est un endroit où on ne peut pas se passer l’un de l’autre » - citation de Jean-René Dreinaza dans son intervention au colloque de Rasine Kaf le samedi 6 décembre.

Justin