Désertin an parlan d’si lo shantié la rout litoral, la di konm sa sé lo pli gran léskandal di sièkl pou la Rényon. Sanm pou mwin sak la di sa la pa tro égzazéré. Déza sé in léskandal par rapor lo pri, in miliar sisan i di san konté lo zavnan, vik néna i prévwa in ponyé zavnan. Final do kont na pwin inn lé kab di zordi konbyin tousala va rovyin a nou. Pwatan, lé éspésialiss i di, navé mwayin fé pou mwin shèr, in prozé pli prop, pli ékolo. Alorss, pou fé la rout, konm mwin zot la antann parlé lo rosh Madégaskar.

Gran débi minm la di a nou, rosh isi sora sifizan, aprésa la fé v’ni an kashièt rosh Madégaskar, zordi ni rann a nou kont, konm lay, konm zognon, konm karot é bin nou néna lo rosh déxportasyon. Lo dézyinm léskandal. I prétan la ba Madégaskar, ousa i éstré lo rosh landrwa la finn défiguiré i prétan. Zordi, in zournal déor i anparl, zis pou donn inn ti lidé li di konm sa, landrwa i éstré, néna in trou grandèr dé térin foot-bal, profondèr 45 mèt.

Arzout èk sa lo roulman kamyon, lo tir la minn, lo bri zanjin, pour bann zabitan lé pi siportab. Aprésa parl pi trikmardaz néna rant lo pri rosh la ba èk sad isi, néna i di minm kan lo rosh i ariv argard byin si na pwin zanguy dosou. Vi lé trikmardaz néna rant lantropriz laba, isi, rant transportèr, rant bann moun la rézyon, si lo galé lé prop, si li lé byin lavé, vik i fo byin lavé i di. Minm si li lé byin lavé, èk lo la mèr, ispouré néna ankor zanguy d’sou lo rosh !