Oté

Somaz bann diplomé : Kozman pou pa la boush i pi !

Justin / 6 novanm 2007

Oté ! nana la moitié la popilasion La Rénion i niabou an aoir in diplôme kan zot i sort lékol, in CAP-li, in brové-li, in bak-li, in BTS-li épi d’ot ankor. Solman, néna in bonpé, an parmi, na poin travay. Poitan, diplôme-la la pa parti rod dann boit boniks, la pa trap sa non pli sou la pat-shoval.

Bin alor, kouk’i losh pa la-dan ? Moin noré anvi dir sé pou rézon la pa fé in léfor sérié pou mète dakor lo bann plas travay avèk lo bann diplôme : asiréman, mon kamarad ! Na mèm poin shak ané in kontaz bann plas travay. Alor, lo bann zènn, i anbèk dann in formasion épi travay guète dan in trou, zéro kalbas la fimé granboi.

Pou mon par, moin la vi dann déssèrtin péi bann sèrvis ofisièl i koné par avans konbien plas travay noré dann inn, dé, troi z’an dann tél, tèl, tèl métié. Alor, si ou anbèk dann in formasion, ou lé sir ou lé pou gingn in travay boudikont. Mi di é mi ardi, sak i gingn fé déor, issi oussi i gingn fé. Alor nora pa la pène alé konté konbien diplomé na diplôme épi na poin travay. Sa i anshèv déprime banna. Épi i ansèrv pa arien : sé koz pou pa la boush i pi !

Justin