Mi pans par movèz shans in zour zot la di tonm dsi in moun son moulin la paroli téi marsh plin tib. I égzis demoun konmsa.I égzis osi demoun i koz près pa, ébin inn onm l’ot lé pa gayar. Mé bann kozèr d’fon sa lé bon pou fatig out zorèye. L’avé in foi, patati-patata ! Ou lé a d’mandé ousa banna i tir parol, i tir kozman pou rakonté. Mé zami, mi pé dir azot kan ou la tonm an voiyaz koté in moun konmsa dé foi ou lé a d’mandé-an ou mèm !-oté radyo, koup in kou lo son siouplé, koup in kou lo son par pityé. Mé pétète zot i préfèr bann moun konmsa plito ké d’moun i koz pa ditou, lé konm martin ki kouzi. Alé ! Mi kite azot rofléshi la dsi é ni a rtrouv pli d’van. Sipétadyé !