Mi antan i di konm sa “lo prézidan i sar bat a tèr son dérnié kart“ sanm son prozé d’lwa d’si lo kod du travay. Pou banna I pass ousinonsa i kass. Si i pass, shomin lé rouvèr pou kontinié raz la pint pou nou, si i kass, konm li di, sora rogrétan pou travayèr, vik, la min d’si lo kèr, li di, la lwa sé pou travayèr. Sov, na pi inn i krwa pou vréman. Konm si lo prézidan té in zouar kart ? Pétèt banna na rézon. Pétèt, anndan la li lé for ?

Dopi lo tan li zoué èk nou, kart nwar, kart rouz. Sanm pou mwin li na son téknik pou sa. Konm li la fé krwar a nou i gingn trap la linn èk lo dan, tanzaot li fé sanblan doné, aprésa li donn épisa li ropran é nou si nou lé kouyon konm la linn ? Sa sé pou son bann promèss, kont la finanss, pou la génèss, pou lékolozi… Lo pli pir sé kan li ral kart dosou, konm li la fé èk la lwa d’si lo kod du travay. Pou vréman sé in kart dosou.

Kisa té atann in nafèr parèy. Dikou li fé lo kontrèr d’sak li la promèt. Aprésa étonn pa nou si néna i arèt pa di la kouyanad, é mandoné i fé minm la kouyonad. Ni sort war dan lo nor é koté Pari dimansh navé zéléksyon parsièl pou ranplass 3 dépité. Dan lo nor bann la gosh la pi rotrouv zot moun, sanm pou mwin, sa in mové son pou domin. Aforstan tir d’si la kord, i riskab kasé. Na rod inn pou tir kart pou domin. Son kanar lé nwar ?