Médam zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami dan la vi, néna demoune i fé zot shoi vitman – la pa zot pou ézité. Mé an kontrèr néna déssèrtin i ézite in bonpé avan fé zot shoi, mèm défoi zot i shoizi pa, dizon zot i sibi.

Mi rapèl in bon kamarade mwin l’avé téi ézite rantte dë madam. Zot téi vé maryé avèk inn, mé zot téi vé maryé avèk l’ote é sa téi tarde in bonpé si tèlman la famiy lo dé fiye té pa loin dispité. Ziska ké paré-t’il inn la di : « Si lé konmsa alon tir o sor é zot la tir o sor ! ». Donk zot la tir o sor é inn la gagné, l’ote la pèrde mé toulédé té pèrdan final de konte. An touléka, sé sak mi panss pars lo moune la rèst vyé garsson. Konm di Napoléon,an amour la sèl viktoir sé d’baré.

In ka ékstrèm mé ni pé rofléshi la dsi pars afors oute kèr lé rante dé, momandoné wi gingn pi shoizi é pou mon par, mi invite azot rofléshi la dsi é ni rotrouv pli d’van- sipétadyé.