Dimansh dèrnié, lo parti "Tout pou La Rénion" la fé son kongré. Sa lété prévi dopi in bon koup de tan. Lété mèm prévi ké zour-la, lo parti nora fé konèt son program. Touléka, té sak té i di dann zournal la pa arienk zordi. Mi pans, in pé d’moun té i kas pa la tèt pou sa. Moin pèrsonèl, moin té i atann lo program, tout lo program pou La Rénion.
Dakor, pa dakor ! I kont pa, mé ièr matin, moin la parti gard dan bann zournal pou trouv program-la, mé mi pé dir azot, moin la pa trouv mon kont program. Mé a bien kalkilé, moin la kant mèm konprann in n’afèr dan la boush bann résponsab... Inn la di, nora in program pou shak z’éléksion : z’éléksion minisipal, program minisipal ! Z’éléksion Konsèy zénéral, program zénéral ! Z’éléksion réjional, program réjional ! Moin, sak i z’afèr amoin in pé, sé ké na poinn program pou La Rénion. Pars si shak asanblé nana son konpétans, nana kant mèm in lign rouj(!), sé konstruir La Rénion, dévlop ali, son l’ékonomi, son sosiété, son l’anvironman épi son kiltir, é shak koléktivité, dan son travay, i trouv son plas pou fé avans lo program pou La Rénion. Sé konm sa mi oi lé shoz, é mi oi pa koman in program i pé èt otroman.
In résponsab la di, li lé pragmatik. Pragmatik ? Daoir sa i fé bien, mé pragmatik i vé dir shanj pa lé shoz an profondèr, fé sak i gingn. Mé afors fé sak i gingn, sa l’amèn anou dann malizé fors a fors. Pragmatik ? Sa i vé dir ésèy baz dsi in l’évolision é sirtou pa dsi in révolision. Poitan, sé in révolision nou la bézoin, in shanjman ziska dann fon dé shoz. Si i kas pa lo sistèm post-kolonial, ousa nou sava ? Droit dann mir malorèzman.
Boudikont, san alé pli loin, ni pé dir lo TPLR lé bien orizinal, pars son program, sé ké li la poinn program, poinn program pou La Rénion.

NB : Pétèt mi tronp ? Touléka, moin sré kontann tronp amoin !

Justin