Moin té apré koz provèrb avèk in kamrad shagosien é li l’apré dir amoin provèrb-la, sa néna in gran kantité. Ou i parl si moin lé dakor avèk li vi k’mi anparl sa dopi mars 2014 é si moin néna difikilté, la pa pou trouv bann kozman-la, sinploman pou konprann sak zot i vé dir pou d’bon. Mé li la donn amoin inn, moin té i koné pa é so inn-la moin la mark ali an-o la. Néna plizyèr manyèr di sa : inn an parmi sé sak moin la marké, mé néna galman « sort dann Karib pou tonm dann Syla » : sort in gran kap la mèr pou tonm dann in n’ot pli gran ankor. Sans prop, moin lé sir toulmoun i konpran mé sans figiré ? Ou i sort dann in anmèrdatoir pou tonm dann inn pli gran ankor. Sa i fé pans amoin, dann nout kréol rényon i di osi : « sort dan la taye pou tonm dann la m… » Donk avan ou i désid fé in n’afèr, kalkil bien lo konsékans pars ou i kroi ansort aou alé oir ou lé ankor pli mal pri. Alé ! Mi kite azot rofléshi la dsi é ni artrouv pli d’van. Sipétadyé !