Mé zami, zot i koné lo fran CFA ? I parétré sa in moné néna soisann-katorzan sète ané. Néna in bonpé péi l’Afrik dé l’ouèst épi l’afrik ékwatoryal néna moné-la épi néna galman dann la Répiblik Islamik komor. Mé, konm moin a fine dir azot sé plito La Frans i komann dann sistèm monétèr la.
Dabor lo bann biyé i fé laba dann in vil Masif santral i apèl Chamalières-donk in l’antropriz La Frans. Arzout èk sa shak péi néna son prop moné CFA. An pliské sa Trézor piblik fransé sé li k’i ansèrv gardien pou larzan bann péi mi di azot i mète an rézèrv é la plipar d’tan bann péi néna lo fran Cfa i koné mèm pa bien konbien larzan zot néna disponib dann trézor pblik fransé.

Lé vré désèrtin i di bann péi l’afrik lé pa dann l’obligasyon pou pran sistèm fran Cfa, in pé i di mèm bann péi si zot i vé i pé sort dann sistèm-la. Donk, si mi kroi banna sé par pir bonté ké La Frans i shapote bann moné-la. Pir bonté ? Mé i di pa nou konbien shèf d’éta dann L’Afrik la konète bann kou d’éta, é anplis i di pa nou tout lo tor lo sistèm Fransafrik la fé bann péi afrikin.
Poitan zot i koné bann péi moin la déza fine anparl azot lé indépandan, zot néna zot drapo, zot gouvèrnman, zot limn nasyonal mé dizon zot néna in l’indépandans pou la form vi ké zot lé pa mètr dsi la késtyonn prinsipal sète la moné.

Si mi anparl azot sa zordi sé pars prézidan La Frans la déklar son péi i sava tir la bride dsi l’kou bann péi afrikin pou arète in kou avèk lo sistèm fransafrik. Donk lo fran Cfa d’apré bann zakor rant bann péi afrikin i dovré arété dann l’ané 2020 pou ranplas ali par in moné i apèl l’éko é avèk la garanti La Frans épi lo sistèm Fransafrik i sava arète shamélé.
La di ! La di ! Mé sépa si va fé ! Pars i fodré pa sort par la sort par la port pou ar-rant par la fénète konm sa i spass dopi 74 zané.