An parmi lo bann mové kozman, déssèrtin i donn la MCUR na inn i rovyin souvan-défoi : i di k’i anploy demoun, k’i pèy gro-gro salèr avan k’lo z’afèr i égzis pou vréman. Zot i rann konte mé z’ami, pèy demoun san riyin fèr. Koman in n’afèr konmsa lé possib ? Sré-t’i pa in bann z’anploi fiktif ? Antansyon, sa lé défandi fèr in n’afèr konmsa !
Bin zistoman, la pa fiktif ditou. An kontrèr, banna i travay pou vréman... I travay pou prépar la rouvèrtir la MCUR, é d’apré sak mi antan dir, travay i mank pa pou fé. Mé ninport kissa, i pé konprann, pou rouv in n’afèr "énorm" konmsa, i fo komans prépar dépi lontan avan. Zis in n’afèr ! Mi an souvyin dèrnyèr foi la fé in romiz "zarboutan nout kiltir", la-ba Sin-Bénoi. Na inn la di. – Karpanin Marimoutou, si mi tronp pa ! –, l’apré fé in dossyé pou fé mark lo maloya konm patrimoine mondyal par l’UNESCO. Demoun la bate la min, té kontan, mé dé foi, in pé i bate tanbour san fèr, i sèy mé i gingn pa. So kou issi, la séyé, épi la gagné : nout maloya, nout kiltir d’kan, lé rokoni konm patrimoine mondyal .
Kissa la fé so gro travay-la ? Dann zournal i di sé Karpanin, mé Karpanin la pa in diréktèr syantifik la MCUR ? Donk la mézon la pankor rouvèr, mé lo travay i avans. Sa lé byin vré !
In n’ot afèr ankor. Minis la kiltir dann gouvèrnman La Frans la domann méssyé Colardelle kite son plas diréktèr la MUCEM pou fé in missyon pou mète anlèr bann kiltir l’outrémèr. Mé sa i fé in boute tan li diriz mézon-la, é la pankor rouvèr… mèm si in for lékip i prépar son rouvèrtir. Donk la-ba ossi, i fé konm issi ! Mé pétète d zéssèrtin i pans la-ba sé la-ba épi lé normal, lé byin korèk… mé issi, sé issi épi i fo pa fé in n’afèr konmsa ! Mé Konm bann marmay lontan té i di : "Sorte la don ! Déboul dann mon kol, pinèz !".

Justin