Biensir, i di a nou bande pèrsonèl soignan é bande pompyé épi d’ote i vanje pars d’issi la fin lo moi déssanb in bonpé d’moune la rofize lo pass sanitère i sava pèrde zot travaye épi pa toush okin salère… In bone rézon pou révolté sansa in fasson fé porte la résponsabilité dsi bande viktime zot mèm.

I fo pa obliye non pli lo léskandal kloredékone noute zoinal la fine anparl pa arienk in kou avèk lo bande konsékanss dsi la santé d’moune épi la santé la tère dann bannzil zantiye zistoman. Aprésa i fo pa tro zoué l’étoné si l’éta franssé la fine pèrde son krédi. Shé nou, san konté son bande roprézantan ki konpran pa gran-shoze dann pa gran-shoze.

Mé konm noute zoinal la fine signalé bande l’émète sossyal sa i ariv pa konmsa. Si zèrb lé mouyé dofé i pran pa d’fé. Dann zèrb sèk sé in n’ote afèr é lo zèrb sèk sé zistoman in sossyété é in lékonomi an krize. Dann in ka konmsa lo viv ansanb-zoli vitrine pou l’outre-mer franssé-sa lé riskabe kass par boute é pa arienk oussa la fine pété ziska zordi.

Dann bande zantiye konm issi néna tro d’voiyan o rouz é tro d’konplissité d’léta par raporte bande profitère toute lakabi. Alor, mézami, mi panss lé pliské tan pou l’éta d’ète in pé sèryé pou trouv avèk nou bande pèp l’outre-mèr lo bande bon solissyon k’i fo.

Sansa, ébin sansa, néna in zour i apèl domin.

NB-An passan, ni pé touzour rapèl léskandal léspérimantaze bande bonb nikléère avèk toute bande viktime la fé dann la Polinézi. Si tan tèlman ké l’éta franssé la fine pèrde in bon pé son krédi dann l’outremèr. Ni pé rapèl ossi la leucose bovine avèk son bande mové rézilta dann noute péi.