Sé konm k’i diré lé shoz i klosh pa dann kan lo pti prézidan. I oi d’apré son bann grimas dsi son figuir, son bann zèst in pé dézartikilé, son z’épol k’i mont é k’i désann, lé shoz i spas pa bien pou li. Sa lé vré pou nout tout : kan lé shoz i kol pa, sa i oi dan nout fasonn èt, nout fasonn fèr. Sa lé vré pou nou, sa lé vré galman pou lo pti prézidan, plito tourné par déor, l’ékstéryèr, ké par anndan, l’intéryèr. Poukoué sré konmsa pou li ?

Pars lé shoz i mars pa bien pou li pou vréman. Pou komansé, nana so bann sondaz lé obstiné pou done ali pèrdan, é la pa arienk inn, mé in ta. Armèt la dsi, lo bann gosh li la ramas dann kanal pou mèt azot minis i artourn dann bèrkaye, zot lété gosh, zot i artourn gosh. An pliské sa, bann minis la droite galman i san pa zot bien koté d’li é i di zot va vot Hollande : nana inn i apèl madam Girardin, lété minis dann tan Chirac, é mèm k’èl té i di pou bann z’anploi jènn, i lès arpa pèrsone dsi l’bor shomin. Ni koné kosa l’arivé ! Zordi sé Sarko k’èl i rèv palank dann kanal. Antansyon, nana in pé i domann vot pou Sarko, mé zot i sort ali in shaplé armontrans si tèlman ou lé a d’mandé si zot i domann vréman vot pou li.

Alor, zot i konpran, lo kèr lo prézidan la pa an kèr d’solèy, é lé loinn la. Li na bo di, antansyon moin l’apré prépar in sirpriz ; Mé sof a gingn oir son momon jènn fiy, mi oi pa kèl sirpriz i sava an avoir ziska dimansh o soir. Demoun na l’inprésyon li lé pri dan la kol. Sa i fé pans amoin, moin té dann in rényon piblik, dann tan moin lété marmay. Lo boug té i koz lété profésèr Henry Lapierre. Sa té in gran profésèr, sa té in gran militan. Donk li té apré kritik in bann droite, solon li, banna lété bati d’avans. L’èr-la, li té i di, konm dann tan Mardi gra : "Sot koman ti vé, toué lé pri dan la min korbo !".

NB : Zordi ni pé di : "Sot koman ti vé Sarko, toué lé pri dan la min korbo !".

Justin