Mézami, zot I koné néna dé kozman lé an foutan in pé partou dsi la tère é sak mi anparl azot zordi, sa I sorte Sénégal. Sa sé konm in zé laba dann déssèrtin vilaz : bande jenn jan I alime in fé avèk bande broussaye épi I zoué a sote d’in koté d’lote. Défoi I mank, I artonb dann fé é I bril-bril in pé é sa I fé rir lo léspéktatèr.

L’èr-la zot I di, I rèss arienk lo sotèr pou fé lo gran so-sak I fé sorte la vi d’issi pou alé la vi d’laba. Pars kan lo boug i di i rest la persone in dèrnyé so pou fé : mi pans li vé di lo so dann l’ot koté la vi.

Astèr sa in proverb é li néna in sanss ké lé pa lo sanss prope, mé lo sanss figuiré. I vé dir sinploman, néna d’ote zé pou fé ké bande zé bète-bète. D’ote shoze pou fé ké bande zinbéssilité Issi La Rényon I di : trape dé pti boi é zoué dann la mèrde si ou na poin arin pou fé. Anfin zot I koné toulmoune la zoué zé bète dann zot vi épizapré la vni pli saz pli réfléshi pou fé bande zafèr néna in sanss pli arfléshi. Antouléka sé sak in pé I pans mé shakinn lé lib son shoi..

Alé ! Mi kite azot rofléshi la dsi é ni artrouv pli d’van. Sipétadyé.