Na dé foi, ou l’a pou domandé si dann bann gran vaza i gouvèrn anou na poin in pé i pran anou pou dé léstré, in-dé zéro a la gosh d’in shif, sak i pran po d’shanm pou pla kouvèr, makaroni pou la bouzi. Kossa i fé sort amoin in tralé lo mo konmsa ? É, mon bann dalon, zot i ékout pa radio, zot i gard pa zournal ? I diré k’non, si zot i konpran pa de koué moin l’apré kozé.

Ala l’afèr : gouvèrnman la fé in loi pou fé rèss bann moun danzéré an tol, mèm kan z’ot tan la fini - nou va arkoz de sa -, mé pou l’instan, sak i mète amoin an kolèr, sé sak i suiv. Konm in bon pé loi, sète-la, la parti dovan lo konsèy konstitisionèl ? Lo konsèy la désid siprime in bout la loi akoz lavé pa réspèkt lo prinsip « la non-rétroactivité des lois pénales ». Pou in gardien, la konstitission la pa for : rozman nana in n’ot gardien pou avèy ali.

Sof ké lo prézidan i pèrd pa la kart, li monte déssi son zèrgo : li domann l’avi in n’ot gran tribinal, mé banna i réponn ali, konm té i di danntan karnaval : « Sote koman ti vé koko, toué lé pri dan la min korbo ! ». In promié boush-ta-guèl lavé assé, i fé pa bon alé rode in n’ot... pétète talèr in n’ot si li kontinié sote anlèr.

Justin